පොල් ගස වර්ෂය පුරාම මල් පිපීම සහ ඵල දැරීම නිසා වෙනත් ශාක වලට වඩා විශේෂත්වයක් දරයි. එම නිසා ප්‍රශස්ථ අස්වැන්නක් සදහා ප්‍රමාණවත් ජල සැපයුමක් මෙන්ම පෝෂක සැපයුමක් ද අඛණ්ඩව පවත්වා ගත යුතුයි. සෑම මසකට වරක් පොල් අත්තක් නිපදවන අතර පොටෑසියම් සැපයුම අඩු තත්ත්වයක් යටතේ පොල් අත්තේ ආයු කාලය අඩු වේ. එමෙන්ම පොල් අතු ප්‍රමාණයෙන් කුඩා වන අතර ගසක නිපදවෙන අතු සංඛ්‍යාවද අඩු වේ. ඒ අනුව නිපදවෙන මල් සංඛ්‍යාව අඩු වන බැගින් පොල් වගාවේ ඵලදායිතාව අඩු වීමට ඍජුවම බලපායි. පැළ වගාවකදී පොටෑසියම් සැපයුම අඩු වුවහොත් පීදීම සඳහා ගත වන කාලය වැඩි විය හැකි අතර නිවැරදි පෝෂක කළමනාකරණයක් යටතේ පොල් පැළයක් ක්ෂේත්‍රයේ සිටුවීමෙන් වසර 4ක දී හෝ ඊට පෙර පීදීමට හැකියාවක් ඇත. පොටෑසියම් වේගවත් වර්ධනයකට පමණක් නොව අස්වැන්න ලැබීමට ගත වන කාලය (pre-bearing period) අඩු කිරීම සඳහා ද ඉතා වැදගත් වේ. පොටෑසියම් මඟින් සෛල තුළ අයන තුලිත භාවය පවත්වා ගැනීමටත්, මුල් වර්ධනයටත් වැදගත් වන අතර ශාක තුළ සීනි හා තෙල් (sugar and fat) මෙන්ම තන්තුමය ද්‍රව්‍ය නිෂ්පාදනය සඳහා ද පොටෑසියම් වැදගත් වේ.
පොල් ගසකට අවශ්‍ය කරන නයිට්‍රජන් ප්‍රමාණය කුකුල් පොහොර, එළු පොහොර, ගොම පොහොර, වෙනත් සත්ත්ව පොහොර සහ ග්ලිරිසීඩියා වැනි කොළ පොහොර මඟින් ලබා දිය හැකි වේ. මෙහිදී ඉඩමේ ප්‍රමාණය අනුව අවශ්‍ය පොහොර ප්‍රමාණය සැපයීම පිළිබඳව ඉඩමට ගැලපෙන ක්‍රමවේදයක් සකස් කර ගැනීම සදහා වගාකරුවන්හට නිවැරදිව මග පෙන්වීමක් සිදු කල යුතු වේ. අවශ්‍ය කරන පොස්පරස් ප්‍රමාණය එප්පාවල රොක් පොස්පේට් වලින් ලබා දීමේ හැකියාව ඇත. වසරකට ගෙඩි 50 -75ක් පමණ අස්වැන්නක් ලබා දෙන පොල් ගසකින් පොටෑසියම් ග්‍රෑම් 1248ක් පමණ ප්‍රමාණයක් ඉවත් වේ. සත්ත්ව පොහොර හෝ කොම්පෝස්ට් පොහොර භාවිත කිරීමේදී ඵල දරණ ගසකට අවශ්‍ය කරන පොටෑසියම් ප්‍රමාණය සම්පූර්ණයෙන් ලබා දීම ඉතා වැඩි ප්‍රමාණයක් යෙදීමට සිදු වන බැවින් ඒ සඳහා විකල්ප අමුද්‍රව්‍ය භාවිත කිරීමට සිදු වේ. රසායනික පොහොර යෙදීමේදී නම් මෙම පොටෑසියම් ප්‍රමාණය මියුරියේට් ඔෆ් පොටෑෂ් ග්‍රෑම් 1600 ක් මඟින් සපයයි. විකල්ප අමුද්‍රව්‍ය භාවිතයේදී ඉඩමේ පවතින අමුද්‍රව්‍ය ප්‍රමාණය සහ පොල් ගස් සංඛ්‍යාව අනුව ගණනය කර යෙදිය හැකි වේ. උදාහරණයක් ලෙස කුකුල් කොටු පොහොර (20% – 30% තෙතමනය සහිත) 30kg භාවිත කිරීමේදී ඉඩමේ පොල් ලෙලි පවතී නම් ලෙලි 108ක් හෝ පොල් ලෙලි අළු 3kg ක් හෝ ග්ලිරිසීඩියා 24kg ක් හෝ වල්සූරිය 7kg ක් හෝ පොටෑසියම් සල්පේට් 1kg ක් භාවිත කර පොටෑසියම් අවශ්‍යතාවය සැපිරිය හැකි අතර අනෙකුත් පෝෂක අවශ්‍යතාවයන් සියල්ලද මෙම නිර්දේශය මඟින් ආවරණය වේ.
රසායනික පොහොර භාවිතයෙන් තොරව පොල් ගසකට අවශ්‍ය කරන පොටෑසියම් ලබා ගැනීමට භාවිත කළ හැකි අමුද්‍රව්‍ය පහත ලෙස දැක්විය හැකිය.
- පොල් ලෙලි, පොල් ලෙලි අළු, පොල් අතු, හනසු, මටළු, පොල් ලෙලි වතුර, පොල් වතුර
- වල්සූරිය (Tithonia Diversifolia)
- දැව අළු, දහයියා අළු
- ජීව අඟුරු (Bio Char) සහ කර දහයියා (half burn paddy husk)
- ගව මූත්‍රා කොම්පෝස්ට් නිෂ්පාදනයේදී භාවිත කළ හැක.
- ග්ලිරිසීඩියා (ප්‍රධාන වශයෙන් නයිට්‍රජන් ලබා දුන්න ද සැලකිය යුතු පොටෑසියම් ප්‍රමාණයක් ද ලබා දේ)
- එරබදු
- පොටෑසියම් සල්පේට් - (පොළොවෙන් ලබා ගන්නා පොටෑසියම් අඩංගු පොහොර)
- මයිකා
- ෆෙල්ස්පාර් (මෙම කර්මාන්ත වල අවශේෂ වන කොටස් පොටෑසියම් පොහොර ලෙස භාවිතය පිළිබඳව අවධානය යොමු කළ යුතුයි)
· ඉහත කාබනික ප්‍රභව මඟින් පොල් වගාවට අවශ්‍ය කරන පෝෂක සැපයීමේදී පසේ ක්ෂුද්‍ර ජීවීන්ගේ ක්‍රියාකාරීත්වය ඉහළ යන නිසා (උදා: මයිකොරයිසා) ශාක වලට ලබා ගත නොහැකිව පසේ තිරවී ඇති පොටෑසියම් සචල පෝෂක බවට පත් වී මුල් මඟින් අවශෝෂණයට අවස්ථාව ලැබේ.
බහුලව භාවිත කරන කාබනික පොටෑසියම් ප්‍රභව කිහිපයක අඩංගු පොටෑසියම් ප්‍රතිශත පහත ලෙස දැක්විය හැකිය.
ප්‍රභවය | K2O % වියළි බර |
වල්සූරිය | 2.15 – 4.20 |
ග්ලිරිසීඩියා | 1.45 – 2.95 |
කුකුල් පොහොර (Layer) | 1.7 – 2.25 |
කුකුල් පොහොර (Broiler) | 1.7 – 2.0 |
ගොම පොහොර | 0.4 – 2.0 |
එළු පොහොර | 0.7 - 2.8 |
කොම්පෝස්ට් පොහොර | 0.8 – 1.4 |
ඌරු පොහොර | 0.4 – 0.94 |
පොල් ලෙලි වතුර | 0.06 |
එරබදු විශේෂ | 0.92 – 2.88 |
කැප්පෙටියා | 1.25 – 1.85 |
පාවට්ටා | 3.00 – 4.50 |
කොම්පෝස්ට් පෙලට් | 0.8 – 1.25 |
කොම්පෝස්ට් දියරය (කොම්පෝස්ට් ටී) | 0.98 – 2.63 |
මාළු නිස්සාරකය (ෆිෂ් ටොනික්’) | 0.91 – 2.83 |
ප්‍රදේශ අනුව අවම පිරිවැයක් වැය වන පරිදි සපයාගත හැකි කාබනික පොහොර හෝ ද්‍රව්‍ය වෙනස් විය හැකි වේ. මෙම පෝෂක කළමනාකරණය සමඟ අනෙකුත් සියලු පොල් වගා නඩත්තු කටයුතු නිවැරදිව සිදු කිරීමෙන් යහපත් ප්‍රතිඵල ලබා ගත හැකි වේ. තවද ලබා ගත හැකි කාබනික ද්‍රව්‍ය ප්‍රමාණය මත සහ ඉඩමේ ප්‍රමාණය අනුව (පොල් ගස් සංඛ්‍යාව අනුව) පොහොර යෙදීමේ වැඩසටහනක් ඒ ඒ ඉඩමට ආවේණික වන සේ සකස් කර ගත යුතු අතර එය වසර පුරාම ක්‍රියාත්මක කිරීමෙන් සෑම ගසකටම අවශ්‍ය පොහොර ප්‍රමාණය සැපයීමට කටයුතු කළ හැකි වේ.
0 Comments